ചിലരങ്ങിനേയുമുണ്ട്...!!

മഴ വെട്ടിയ മണ്ണിനടിയിലും കാണാതായ കളിവഞ്ചി തിരയുന്നവര്‍..
പാട്ടിന്‍റെ അവസാന വരിയിലെ കുനിപ്പില്‍
തൂങ്ങിയൊന്നാടി കൊമ്പൊടിഞ്ഞെന്ന് കരയുന്നവര്‍..
കാന്‍വാസിലെ ചിത്രങ്ങളിലെ ചായങ്ങള്‍
ഓരോന്നോരോന്നായ് ചിരിയിലണിയുന്നവര്‍..
കാറ്റിനോട് കെഞ്ചി നഗ്നത മറച്ചു
അടിവയറ്റിലെ ഹൃദയത്തിന് കാവലിരിക്കുന്നവര്‍..

ചിലരങ്ങിനെയൊക്കെയാണ്...!!

മഴയേക്കാള്‍ മേഘത്തിലലിഞ്ഞവര്‍..
തീയോളം ചുവപ്പ് സിന്ദൂരമാക്കിയവര്‍..
ആടിയാടി സ്വയം തിരയുന്നവര്‍..
മങ്ങി മങ്ങി കാഴ്ചയെ കളിയാക്കിയോടിയൊളിക്കുന്നവര്‍...!!